ԶԱՐԹՆԻ՛Ր, ՀԱՅ ՄԵԾ ԺՈՂՈՎՈՒՐԴ...
Հետևելով Հայաստանի Հանրապետությունում (ՀՀ) և Արցախում ընթացող իրադարձություններին, պարզ երևում է, որ ՀՀ և Արցախը կործանման եզրին հասցրած, թշնամու ծաղրի առարկա դարձած ներկա գործադիր և օրենսդիր պարտվողական իշխանությունները ոչինչ չեն անում ՀՀ և Արցախի թշվառ իրավիճակը փոխելու համար և շարունակում են ՀՀ ու Արցախի կազմալուծման քաղաքականությունը։ Պարտվողական իշխանությունների այդ քաղաքականությունը բացատրելի և հասկանալի է. նրանք դրա համար էլ իշխանության են դրվել և մտահոգված են երրորդ երկրների շահերը բավարարելու, գալիք ընտրություններում վերահաստատվելու խնդրով։
Անհասկանալի է սակայն, այսպես կոչված, «ընդդիմադիրների» անտարբերությունն ու լռությունը, իշխանությունների հայակործան քաղաքականության դեմ պայքարի բացակայությունը։ Մի՞թե ստեղծված իրավիճակում առավել կարևոր է միայն ընտրարշավին մասնակցելը, առանց փորձելու վճռական գործողություններով ի չիք դարձնել երկիրը քայքայող իշխանության քաղաքականությունը և դուրս գալ այդ իրավիճակից...
Զարմանալի է նաև ուսադիրներ կրող ուժային և զինվորական հրամանատարության անգործությունը։ Մի՞թե նրանք կորցրել են սպայի պատիվը և իրենց ուսադիրների նշանակությունը պիտի հասկանան այն ժամանակ, երբ նենգ ու ստոր թշնամին բախի նրանց դռները...
Ոչ ոք չի մտածում երկրի և ժողովրդի անվտանգության մասին։ Ժողովուրդն ինքն էլ մոռացել է, որ ինքը հա՛յ ժողովուրդն է, աշխարհի ամենահին ժողովուրդներից մեկը, համաշխարհային գիտությունն ու մշակույթը հարստացրած ժողովուրդը և իրավունք չունի ենթարկվելու իշխանությունը նվաճած խամաճիկների ծամածռություններին, այլ պիտի պայքարի իր պատիվն արատավորած ստահակների դեմ։ Հայ ժողովուրդը Հայկ Նահապետի, Տիգրան Մեծի, հռոմեական լեգեոներներին լծի տակով անցկացրած, հին աշխարհի բոլոր հյուսիսային ազգերի մեջ վեհագույն ժողովուրդն է, Նարեկացու, Անդրանիկի, Նժդեհի, Թեհլերյանի ժողովուրդն է, Արցախյան առաջին պատերազմում թուրքին հաղթած և հայկական օտարված տարածքների մի մասն ազատագրած ժողովուրդն է…
Այս նենգ, ստոր, անազնիվ ու ապիկար աշխարհում ոչ մեկը ոչ մեկին չի օգնում առանց իր շահն ակնկալելու այդ օգնությունից։ Դու՛ պետք է օգնես ինքդ քեզ։ Հայ ժողովուրդ, մի՞թե չես տեսնում, որ վերջին ավելի քան 100 տարվա ընթացքում հեռու և դրացի ժողովուրդներն ու ցեղերը իրենց հարցերը լուծում են Հայաստանի և հայ ժողովրդի հաշվին։ Պետք է վերջ տալ օտարների ձեռնածություններին։
Հայկական պետության 4513 տարվա պատմությունը ցույց է տալիս, որ հայ ժողովուրդը կարողանում է ճգնաժամային, բախտորոշ պահին համախմբվել և դուրս գալ դժվարին ու օրհասական իրավիճակից։ Եկել է հերթական օրհասական պահը...
Զարթնի՛ր, հայ մեծ ժողովուրդ...
#զարթնիր-հայ-մեծ-ժողովուրդ...